Martxoaren 21etik 25era deitu dute grebara, negoziazioek huts egin baitute. Zuzendaritzak lan-baldintzak hobetzeko asmorik ez duela salatu dute langileek.
Aita Menniko langileen elkarretaratzea, aurreko astean. Argazkia: ELA
2017an hasi zen lan-gatazka Arrasateko (Gipuzkoa) Aita Menni ospitalean eta, guztira, hemeretzi greba egun egin dituzte. Lau eguneko grebaldi berri batera deitu zuten aurreko astean, antza, zuzendaritzak "ez baitu eduki zehatzik proposatu" lan-baldintzen inguruko negoziaketetan, eta ez du baldintza horiek hobetzeko asmorik erakutsi.
Hartara, 23 greba egun beteko dituzte ostiralean ospitaleko beharginek. Salatu duten bezala, erietxeko unitateen %80 administrazio publikoaren finantziazioaren bidez betetzen da eta, beraz, enpresak "sekulako kaudimen ekonomikoa" duela azpimarratu dute.
Halere, lan-baldintzak hobetzeko bermerik ez du jarri zuzendaritzak eta, zentzu horretan, lan-karga handitu dela ere salatu dute beharginek. Horrek pazienteen osasun mentalean eragina duela seinalatu dute; izan ere, haien zaintza egokia zaildu du langileek paziente gehiago artatu behar izateak.
Aurreko mobilizazioei jarraiki, hortaz, Aita Menniko langileen eskaeren artean daude lanaldiak mugatzea, errotazioak desagerraraztea zein kontratazioak, lan-osasuna eta, oro har, lan-baldintzak hobetzea. Hitz batean, lan-itun berri bat dute helburu, 2017tik ez baita berritu.
