Aurreko ostiralean milaka lagun atera ziren kalera, selektibitate berriari buruzko argipenak exijitzeko. Euren haserrea erakutsita eta mobilizatuta, azterketa-eredu berriaren inguruko informazioa eman diezaietela lortu dute ikasleek: urriaren 26a baino lehen jasoko omen dituzte azalpenak.
IAk aurreko ostiralerako antolatutako mobilizazioetako bat, Bilbon.
Batxilergoan mobilizazio-eguna izan zen aurreko ostirala, urriaren 11a: Espainiako Estatuko hamaika lurraldetan egin zuten greba milaka ikaslek, selektibitate-eredu berriari buruzko informazioa exijitzeko. Hego Euskal Herrian ere ikasle andana mobilizatu zen, jasaten ari diren ezjakintasunaren eta ziurgabetasunaren kontra: besteak beste, Ikasle Abertzaleak antolakundeak egin zituen mobilizazioak lau hiriburuetan eta hainbat herritan, Ez jolastu gure etorkizunarekin lelopean.
Eta badirudi fruituak eman dituela ikasleriak erakutsitako haserreak eta egindako protestek: Espainiako Hezkuntza Ministerioak, Unibertsitate Ministerioak eta Espainiako Unibertsitateetako Errektoreen Konferentziak (CRUE) esan dute hilabete honetan argitaratuko dituztela selektibitate berriaren azterketa-eredu guztiak. Argipen horiek urriaren 26a baino lehen emateko konpromisoa hartu dute agintaritzek.
