EAEko autonomia-estatutuari buruzko eztabaidaren erdian, gaiari heldu dio berriz PSE-EEko idazkari nagusi Eneko Anduezak, Durangon (Bizkaia) ospatu duten Arrosaren Jaian. PSE-EE "Euskadi gidatzeko prest" dagoela adierazi ostean, politikariak esan du bere alderdiak ez duela "identitateen estatutu" bat babestuko. Adierazi du "eskubideen, askatasunen, bizikidetzaren estatutu bat" nahi dutela: "Norbaitek identitateen estatutu bat eraiki nahi badu, ez dezala Alderdi Sozialista aintzat hartu, ez baikara inoiz hor egon, eta ez baikara inoiz hor egongo".

Horrekin batera, Anduezak defendatu du "hilik" dagoela "independentziaren eztabaida": "Batzuen independentziarako nahiak jada ez daude kalean, eztabaida hori hilda dago, eztabaida hori desagertuta dago, jada ez dago euskal herritarren artean". Gaineratu du "Euskadin asko ikasi" dela "Kataluniako esperientziatik" eta orain ez dela "horretaz hitz egiten", eta uste du gaur egun ez dagoela "Euskadi independentea lortu nahi duen gehiengo sozialik".

PSE-EEko buruzagi ohi Idoia Mendiak azaldu du autonomia-estatutuak "aterki" bat izan beharko lukeela "nazionalistentzat eta ez-nazionalistentzat", eta "behartuta" daudela Gernikako Estatutua nolabait berritzera, eskubideak "blindatzeko" eta horrekiko erantzukizunagatik. Dena den, argi kokatu du balizko autonomia-estatutu berri bat independentzia-proiektu baten aurka: "Haiek independentistak dira eta Euskadiren independentzia nahi dute. Guk herritarrentzat erabilgarria izango den estatutu bat nahi dugu; euskal institutuentzat erabilgarria izango den estatu bat".

EAJk, atzoko Alderdi Egunean, PSE-EEri esan zion "ezinbesteko baldintza" dela nazio-aitortza. Autonomia-estatutuaren auzia izan zen jeltzaleek gehien sakondu zuten gaietako bat.