Bigarrenez eraman zuten ospitalera igandean, eta Puerto III espetxera itzuli zuten ondoren. Hainbat mobilizazio egingo dituzte gaur ere Iñaki Bilbaoren alde; Donostian, manifestazio bat antolatu dute larunbaterako.
Atzo Basaurin Iñaki Bilbao preso politikoaren alde egindako ekimena. Argazkia: AAEAM
Gose eta komunikazio grebaren seigarren astean sartzera doa Iñaki Bilbao Txikito preso politikoa. Dagoeneko bitan eraman dute ospitalera, azkenengoz, joan den igandean. Handik Puerto III espetxera (Andaluzia) bidali zuten berriz, Aministiaren Aldeko eta Errepresioaren Aurkako Mugimenduak jakinarazi duenez.
Irailaren 28an ere ospitaleratu zuten, eta "bizirik mantentzeko egin behar den guztia egin dadin" eskatu zuen Espainiako Auzitegi Nazionalak. Gaur, 42. eguna du gose greban Bilbaok.
Espetxeetan nahiz kalean, hainbat ekimen egiten ari dira Bilbaori elkartasuna erakusteko. Gaur, esaterako, 24 orduko baraua egingo du Mikel Sansebastian preso politikoak, Saioa Sanchez, Patxi Ruiz, Jon Kepa Preciado, Oskar Barreras eta Dani Pastorrekin batera abiatutako elkartasun dinamikan.
Mobilizazioak, egunero
Kalean ere antolatu dituzte mobilizazioak:
- Gaur, hilak 21: Donostian (Gipuzkoa), 19:00etan; Bilbon (Bizkaia), 19:30ean; eta Berriozarren (Nafarroa), 20:00etan.
- Bihar, hilak 22: Donostian (Gipuzkoa), 19:00etan; Azkoitian (Gipuzkoa), 19:00etan; Berriozarren (Nafarroa), 20:00etan; Basaurin (Bizkaia), 19:30ean; eta Trapagaranen (Bizkaia), 19:30ean.
Larunbaterako ere egin dituzte deialdi batzuk dagoeneko:
- Donostian (Gipuzkoa), manifestazioa egingo dute: 19:00etan, Bulebarretik.
- Busturialdean (Bizkaia), auto karabana antolatu dute, 19:00etan Lamerako autobus geltokitik hasita, Bermeotik Gernikarako bidea egiteko.
