Iaz martxan jarritako dinamika berrartuz, aurten ere formakuntza teorikoan sakontzeko mintegiak prestatu ditu GKSk. Pasa den asteburuan egin zituzten aurtengo lehenengo saioak Gipuzkoan, Nafarroan, Bizkaian eta Araban, eta ehunka gazte elkartu ziren.
Urriko aurreneko asteburuan ekin die Gazte Koordinadora Sozialistak ikasturte politiko honetako formakuntza mintegiei.
Aurreko asteburuan ehunka gazte bildu ziren Hego Euskal Herriko hainbat gunetan; zehazki, Araban, Bizkaian, Nafarroan eta Gipuzkoan egin zituzten saioak.
GKSko kideek adierazi dutenez, "militanteek hausnarketarako gaitasun kritikoak garatzeko asmoz" antolatu dituzte mintegiak. Besteak beste, honako gaiak landuko dituzte aurtengo saioetan: "tradizio sozialistak izandako eztabaida estrategikoak", "krisiaren teoriaren inguruko eztabaida, kontzeptualizazioa eta gaurkotasuna" edota "langile mugimenduaren esperientzia historikoen ezagutza eta irakaspenak". Dena den, egungo testuingurua ulertzera eta "praktika politikorako gakoak ateratzera" bideratuko dituzte mintegiak.
Formakuntza saioak "egungo
despolitizazio kulturari aurre egiteko eta problematika ugaritan eragiteko" ezinbesteko tresnatzat jo ditu GKSk. Mintegiak ikasturte politiko osoan zehar egitea aurreikusi du.
