Urteko lehen hiruhilekoan, %40,4 egin dute gora Iberdrola energia-enpresaren irabaziek, eta %39,4 BBVA banketxearenek.
Iberdrolak 1.485 milioi euroko irabazi garbiak izan ditu urteko aurrenengo hiruhilekoan, eta BBVAk, berriz, 1.846 milioi eurokoak. Iazko garai berdinarekin alderatuta, bien kasuan areagotu da lortutako etekina: %40,4 hazi dira Iberdrolaren irabaziak iazko lehen hiruhilekoaren aldean, eta %39,4 BBVArenak. Horiek dira Balore Merkatuaren Batzorde Nazionalak (CNMV, gaztelerazko sigletan) aste honetan argitaraturiko datuak.
BBVAk, zehazki, 541 milioi euroko irabaziak izan ditu Espainiako Estatuan lehen hiruhilekoan, iazkoan baino %9,5 gutxiago. Kredituak eta deposituak, hurrenez hurren, %1,2 eta %3,1 jaitsi dira. Dena den, bezeroei %8 mailegu gehiago eman dizkie banketxeak, eta %3,3ko berankortasun tasa izan du maileguetan.
Iberdrolaren kasuan, %37,7 igo da ustiapenaren emaitza gordina (ebitda): 4.064 milioi eurotik gorakoa izan da. Bestalde, energia-enpresaren azken hamabi hilabeteetako datuei dagokienez, inbertsio gordinak 10.400 eurokoak izan direla dio CNMW-k. Sareak eta Berriztagarriak negozioei loturikoak dira inbertsio horien %90.
Iaz ere, irabaziak gora
2022. urtean, aurreko urtean baino etekin handiagoa lortu zuen Iberdrolak: %11,7 handiagoa, hain justu. Espainiako Estatuko sei banketxe nagusiek ere irabaziak areagotu zituzten 2022an, BBVAk barne. Inoizko daturik onenak izan zituen banketxe horrek: 6.420 milioi euroko irabaziak, 2021ean baino %38 gehiago.
