Francesca Albanesek, Nazio Batuen Erakundeak lurralde palestinar okupatuetarako duen errelatore bereziak, astelehenean hitz egin zuen Genevatik: esan zuen behetik jotakoa dela Gazako 65.000 hildakoen datu ofiziala, eta benetako kopurua 680.000 biktimara irits daitekeela, hainbat akademiko eta zientzialariren datuen arabera. Albanesek azaldu duenez, Gazako lurralde-suntsiketa eta biziraun duen biztanleriaren zenbaketa kontuan hartzen ditu ikerketa horrek; gainera, informazioa baieztatuz gero, biktimetatik 380.000 bost urtetik beherako haurrak izango lirateke.

Errelatorearen esanetan, Israelgo Estatuaren bonbardaketek eta arma ez-konbentzionalen erabilerak eragindako suntsiketaren tamainak auzo osoak desegin ditu, eta gorpuzkiak atzematea eta berreskuratzea zaildu du. Prozesu horrek urteak beharko lituzke. Gainera, Albanesek langile humanitarioen, kazetarien eta NBEko langileen hilketa salatu du, baita milaka palestinarren atxiloketa arbitrarioa eta tortura ere, Israelgo espetxeetan.

Era berean, genozidiotzat jo du Gazako egoera, eta Israeli eta haren alde dauden herrialdeei, hala nola AEBei, Alemaniari eta Erresuma Batuari, sarraskiaren konplize izatea leporatu die, sionisten erasoaldia ez geratzeagatik. Era berean, NBEko estatu kideek ilegalitatea eta Nazioarteko Zuzenbidearen urraketa normalizatu izana kritikatu du, "biztanleria zibila babesteko eta bere eskubideak bermatzeko" asmoz, "nazioarteko ekintzara" dei eginez.

Azkenik, Albanesek ohartarazi du okupazio militarra areagotu egin dela Zisjordanian; izan ere, 1.000 palestinar baino gehiago, tartean 212 haur, erail ditu Israelek 2023ko urritik. Gainera, errefuxiatu-eremuak suntsitu eta milaka zibil nahitaez lekualdatu behar izan direla gogorarazi zuen, Palestinako krisi humanitarioaren larritasuna eta tamaina nabarmenduz.