Covid-19 birusaren hedapenak mundu mailako krisialdia sortu du, eta gurean ere badira aste batzuk salbuespen egoera indarrean sartu zenetik. Alarma egoerak askotariko ondorioei egin die bide; hala nola, lan-arloan (kaleratzeak, lanaldi murrizketak edota langileen babeserako neurrien urraketa), etxebizitzaren arloan (alokairuak ordaintzeko ezintasuna), indarkeria matxistaren arloan, kontrol sozialaren arloan (isunak nahiz atxiloketak), eta abar.

Hala, krisialdi honen ondorio berehalakoak jasaten eta bizitzen ari direnen testigantzak jasotzeko kanpainak jarri dituzte martxan Euskal Herriko hainbat eragilek, tokian toki.

Esaterako, Tolosaldeko (Gipuzkoa) Gerizpe Emakume Langileon Defentsa Taldeak, Hernaniko (Gipuzkoa) Kontrakantxa gaztetxeak, Donostiako (Gipuzkoa) M1 Langileontzat plataformak, Laudioko Gaztetxeak (Araba), Bergarako (Gipuzkoa) Lubaki Langile Elkartasun Sareak, Zarauzko (Gipuzkoa) Danda gazte asanbladak, Zumaiako (Gipuzkoa) Iparra taldeak edota Azpeitiko (Gipuzkoa) Krisiaren Seme-Alabak Sare Sozialistak, Ondarruko Gaztetxeak (Bizkaia), Lekeitioko Gaztetxeak (Bizkaia), edota Irungo (Gipuzkoa) Erlaitzek martxan dituzte testigantzak biltzeko eta krisialdiak gehien kolpatutakoei ahotsa emateko dinamikak, salaketari zein hausnerketei bide eman asmoz.

AUTODEFENTSA ETA BALIABIDEAK

Bestalde, zehazki lan-arloari dagokionean, informazioa eta baliabideak eskuragarri jartzeko kanpainak abiatu dituzte hainbat autodefentsa sarek; tartean, Goierriko (Gipuzkoa) Bategin Autodefentsa Laboraleko Sareak, Durangaldeko (Bizkaia) Beharginon Autodefentsa Sareak, Bilboko (Bizkaia) Langile Autodefentsa Sareak, edota Iruñerriko (Nafarroa) Langileen Autodefentsa Sareak.