Voxek kereila bat aurkeztu du Madrilgo Instantzia Auzitegiko Instrukzio Sekzioan, Espainiako Gobernuak Madrilgo Erkidegoan daukan ordezkari Francisco Martinen aurka. "Delituak jazartzeko eginkizuna ez betetzea" eta "omisioagatiko prebarikazio administratiboa" egotzi dizkio Voxek, irailaren amaieratik Puerta del Solen izaten ari den etxebizitza-kanpaldiari lotuta. Alderdia herri-akusazio gisa aurkeztu da, eta esan du Gobernuaren Ordezkaritzak "ez duela kontuan hartu udalak eta Madrilgo Erkidegoak delitu-itxura duten gertakariei buruz bidalitako informazioa". Zigor Kodearen 408. artikuluko ustezko delitu bat egozten dio kereilan, baita lege-testu bereko 404. eta 11. artikuluetan aurreikusitako delitu bat ere.
Alderdi faxistaren arabera, Madrilgo administrazioek Gobernuaren Ordezkaritzari informazioa helarazi zioten, esanez "kanpamentuan tamaina handiko aiztoak eta harriak" zeudela, "ondare-elementuetan kalteak" egon zitezkeela eta "informazio-profesionalekin istiluak" gertatu zirela; baina, Voxen bertsioaren arabera, horren ondoren "ez zen beharrezko jarduerarik gauzatu balizko erantzuleak identifikatzeko". Kereilaren arabera, irailaren 26tik 27rako gauean hasi zen kanpaldia, Madrilgo Maizterren Sindikatuak deitutako etxegabetzeen aurkako manifestazio baten ondoren. Voxen esanetan, ez dago jasota antolatzaileek kontzentrazioa aldez aurretik gobernu-agintaritzari jakinarazi ziotenik, igarobide publikoetako bileretarako araudiak ezartzen duen bezala, eta nabarmendu du kanpalekua amaiera-data zehatzik gabe mantendu dela. Voxek kereilan aipatzen dituen gertakarien artean, Madrilgo Erkidegoko Ondarearen Zuzendaritza Nagusiaren txosten bati buruz hitz egiten da. Txosten horretan, idatziaren arabera, Correosen egoitzan egindako "pintaketak eta grafitiak" aipatzen dira; eraikin hori Interes Kulturaleko Ondasun modura dago aitortuta. Beste hainbat eskulturak eta fatxadak ustez jasandako kalteak ere seinalatzen dira kereilan, baita kanpaldiaren berri ematean zenbait komunikabidek salatutako gertakariak ere.
Madrilgo Maizterren Sindikatuko bozeramaile batzuk, Gazte Koordinadora Sozialistako (CJS) bi bozeramaile eta Kanpaldiko Hirigintza Batzordeko kide bat ere hartzen dituzte jopuntuan kereilan, bai eta instrukzioak irauten duen bitartean identifika daitezkeen gainerako ustezko sustatzaile eta antolatzaileak ere. Kereilatu horiei Zigor Kodearen 514.1 artikuluko ustezko delitu bat egozten diete, 513.2 artikuluari lotuta. Atal horretan, "bileren edo manifestazioen sustatzaileen edo zuzendarien erantzukizuna" seinalatzen da, "baldin eta armak edo objektu arriskutsuak dituzten pertsonak bertaratzen badira, eta ez badira saiatu egoera hori eragozten eskura dituzten bitarteko guztiak erabiliz". Voxek argudiatu du kanpaldiak antolaketa-egitura propio bat duela eta Batzar Nagusi bat eta hainbat batzorde dituela; horien artean Hirigintza Batzordea, denden banaketan eta espazioaren antolaketan esku hartuko lukeena.
Madrilgo Justizia Auzitegi Nagusiak Madrilgo Erkidegoak kanpaldia husteko eskatutako kautelazko neurriak baztertu ondoren iritsi da kereila. Auzitegiak kautelazko neurriak baztertu zituen urriaren 5ean, eta, urriaren 7an, atzera bota zuen eskaera, ebatzita fase horretan ez zegoela egiaztatuta ustezko administrazio-jarduera faltarik.
Voxen hitzetan, kautelazko ebazpen horrek ez du "Martinen erantzukizun penala" aipatzen, ezta "delitu itxura duten gertakarien ikerketa sustatzeko ustezko betebeharra" ere. Era berean, alderdiak adierazi du udalari eta Gobernuaren Ordezkaritzari idazkiak bidali dizkiela ingurua berehala hustu dezala eskatzeko, eta ez duela erantzunik jaso. Eskatutako eginbideen artean, gobernu-ordezkaria eta identifikatutako sustatzaileak eta antolatzaileak deklaratzera deitzeko eskatu du Voxek, baita irailaren 26tik urriaren 8ra bitartean kamera publikoek jasotako grabazio erabilgarriak kontuan har daitezela ere. Halaber, atestatuak, salaketak, zerbitzu-parteak, identifikazio-aktak eta salatutako gertaerekin zerikusia duten gainerako agiriak eskatu dizkie udaltzainei eta Espainiako Poliziari; eta peritu bat ere eskatu du, ustezko kalte materialen izaera eta izan dezaketen kostua norainokoa den zehazteko, baita horien "konponketa-kostua" ere.
