Foruzaingoko bi agenteri ezarritako kondena berretsi du Nafarroako Justizia Auzitegi Nagusiak: sei eta bederatzi hilabete arteko espetxe-zigorrak, eta bi eta hiru urte arteko inhabilitazioa, Tuteran (Nafarroa) pertsona bati emandako tratu txarrengatik. Probintzia Auzitegiak joan den apirilean eman zuen ezagutzera epaia, eta hura ontzat eman du orain Auzitegi Nagusiak.
2025eko otsailaren 12ko gertakariengatik epaitu zituzten bi foruzainak. Auzitegiak frogatutzat jo du buruko arazoak dituen pertsona bat atxilotu eta tratu txarrak eman zizkiotela poliziek, ziegara sartu eta astindu ondoren, aurpegian ukabilkadak eman baitzizkion atxilotuari agenteetako batek. Hirugarren eta laugarren foruzain bat ere bertan egon ziren, eta ez zuten esku hartu. Gertatutakoa grabatu zuten ziegetako kamerek.
Foruzainetako baten interbentzioa da, batez ere, auzitegiek seinalatu dutena: atxilotuari ukabilkadak eman zizkion poliziarena, hain zuzen ere. Ebazpen judizialean jasotzen denez, agente hori (979 zenbakidun plakarekin identifikatua) kalabozora sartu zen, atxilotua "astindu" zuen, "ukabilkada eta kolpeka jo zuen behin eta berriz", "hanketatik arrastaka eraman zuen bankutik lurrera botatzeko", eta "girgiluak bizkarrean zituela eta lurrean botata utzi zuen", biktimaren "aurpegi odolduari jaramonik egin gabe".
