Espainiako Estatuko sindikatu nagusiek, UGTk eta CCOOk, greba orokorrera deitzea erabaki dute, etxebizitza-krisiari lotuta. El País-ek kontsultatutako iturri sindikalen arabera, behin betiko data ez dago oraindik ezarrita, baina azaroaren 29ko hauteskunde orokorrak baino lehen izango da. Ohar bateratu batean, Unai Sordok eta Pepe Alvarezek gidatutako erakundeek berretsi dute aurre-akordio bat dagoela jada greba-deialdirako, etxebizitzari buruzko dekretuek porrot egin ostean aurreikusi modura, eta azaldu dute data "antolakunde sozialekin eta Maizterren Sindikatuarekin aztertuko" dutela, helburutzat hartuta "langileak mobilizatzea 24 orduko greba orokor horretan parte hartu" dezaten, "etxebizitzarako eskubidearen eta soldata duinen alde". Sindikatuetako iturriek azaroaren hasiera aipatu dute, baina oraindik ez dago argi. "Joan den asteburuko manifestazioek eskari horren indarra erakutsi dute, eta erantzuna eskaera horri eusten dioten erakunde guztien artean eraiki behar da", gaineratu dute.
Sindikatu horien erabakia Maizterren Sindikatuak CGTren eskutik greba orokorra bultzatzeko asmoa berretsi ondoren etorri da, UGTri eta CCOOri publikoki eskatu baitzieten bat egin zezatela. Hala ere, aurretik ere harremanak izan ziren, eta Maizterren Sindikatuak bi sindikatuei proposatu zien etxebizitzaren aldeko greba orokorrera deitzea. "Grebak aurrera jarraituko du, akordioak baititugu CGTrekin, sindikalismo borrokalariarekin", adierazi du Alicia del Rio Maizterren Sindikatuko bozeramaileak, eta gaineratu du: "Gure asmoa da herri-botere horrek sindikatuak arrastaka eramatea, noski. Ezin dira begiak itxita egon honen aurrean".
CGTk, bere aldetik, XX. Kongresua egin zuen joan den astean Parlan (Madril), eta bertan Miguel Fadrique gailendu zen buru gisa, oso tarte estuagatik. Fadriquek etxebizitzaren aldeko greba orokorra jo zuen lehentasun nagusitzat: "CGTn 24 orduko greba orokorraren aldeko apustua egin dugu. Hori baino neurri txikiagoek ez dute askorako balio".
CCOOk hauteskundeetan parte hartzea sustatuko du
Grebaren iragarpenaren egun berean, Sordok X sare sozialean adierazi du "CCOOk hauteskundeetan parte hartzea sustatuko" duela, "langile-klasea eta sektore ahulenak defendatuko dituzten gehiengoak lortzeko". "Ezin dugu Kongresuan etengabeko blokeoa onartu, jende ahulenak pairatzen duelako", zioen.
Hauteskunde orokorren eta greba orokorraren deialdiak argitara atera eta ia aldi berean idatzi zituen mezuok Sordok, eta hori ez da oharkabean pasatu. Izan ere, greba orokorra eta "langile-klasea defendatzen duten gehiengoen" aldeko botoa aldi berean aldarrikatzeak eremu anbiguoan kokatzen du sindikatu nagusien deialdia: alde batetik, kaleetatik datorren aldarri erreal bati erantzuten dio; bestetik, hauteskundeen kanpainaurre bete-betean eta PSOEren aliatu historikoak izan diren sindikatuen eskutik iragarri dute greba. UGTk eta CCOOk 2012an babestu zuten 24 orduko greba orokor bat azkenekoz, Mariano Rajoyren gobernuaren murrizketen aurka. Hori dela eta, greba orokor gutxien deitzen dituzten Europako sindikatuen artean daude.
CCOO eta UGT: "Autonomia-erkidegoei eta udalei ere interpelatzen zaie"
CCOOk eta UGTk adierazi dutenez, "greba orokorrak etxebizitzaren arloan eskumenak dituzten administrazio publikoei" eragiten die, baita "soldatek etxebizitza bezalako oinarrizko ondasun bat eskuratzea bermatu behar dutela onartu behar duten enpresa-erakundeei" ere. Hala, kanpainaurreko giroan, sindikatuek diote deialdia "gobernu zentraletik harago" doala eta "autonomia-erkidegoak eta udalak ere interpelatzen" dituela. "AENC berritzea (hitzarmenen itun nazionala, duela bederatzi hilabete iraungi zena) eta hitzarmen kolektiboak desblokeatzea dira hori frogatzeko eremuak", gehitu dute: "Mobilizazioan eta negoziazio kolektiboan jarraituko dugu, etxebizitzak pribilegio izateari utzi eta soldatek duintasunez bizitzeko aukera eman arte".
CEOEk "legez kanpokotzat" jo du greba orokorra
CEOE patronalak, Antonio Garamendi presidentearen bitartez, gogor kritikatu du greba-deialdia: esan du ez duela "legearen barruan" ikusten etxebizitzaren aldeko greba orokor bat, "ez dagoelako lan-gatazka baten barruan". Sindikatuek baztertu egin dute planteamendu hori, eta azpimarratu dute, Konstituzio Auzitegiaren eta Auzitegi Gorenaren jurisprudentziaren arabera, greba politiko hutsak legez kanpokoak direla, baina izaera mistoa badute, laneko arrazoiekin edo ondorioekin loturik, legezkoak direla.
