Topaketara bertaratu eta hainbat aldarri egin zituzten atzo Itaiako kideek. Salatu zuten "geroz eta baldintza miserableagoak" ezartzen dizkietela emakume langileei "zaintza lanak geroz eta gehiago merkantilizatzen" ari diren enpresek.
Nagusi Intelligence Center (NIC) zentroak eta London School of Economics (LSE) unibertsitateak antolatuta, atzo izan zen "longebitatearen ekonomiari eta zainketen ekonomiari" buruzko topaketa Bilboko (Bizkaia) Guggenheimen. "Longebitatearen ekonomian eta zainketen ekonomian jarduten duten profesionalei" zuzendutako topaketa bat da. Guggenheimen izan ziren Itaia Emakumeon Antolakunde Sozialistako hainbat kide, zenbait aldarri egiteko eta entzunarazteko.
Itaiako kideek topaketan altxatutako karteletan, "Emakume langileak esplotatzen dituzue", "Politikarien kolaborazioa" zein "Enpresarien berdintasunaren iruzurra borrokatu" mezuak irakur zitezkeen. Modu horretan salatu nahi izan zuten, "zilarrezko ekonomia delakoan sakonduz", emakume langileak "geroz eta baldintza miserableagoetan lan egitera bultzatzen" dituztela enpresek. "Zaintza lanak geroz eta gehiago merkantilizatzen" ari diren hainbat enpresa izan zituzten gogoan; hala nola, Lagunduz, Babesten, Urgatzi eta Zaintzen. "Instituzio eta administrazio publikoen laguntzaz, emakume langile ugari muturreko esplotaziora kondenatzen dituzte", azaldu zuen Itaiak.
Ezinbestekotzat jo zuen "zaintzako eta garbiketako langileon egoera lehen lerroan jartzea", eta borrokara batzera deitu zuen berriz.
Urte hasieran egin zuen agerraldi bat Itaiak, soldatapeko zaintza eta garbiketa lanei lotutako hainbat aldarri egiteko eta aurkezteko. Ikusi hemen agerraldi horretan esandakoak.
Gaur Bilboko Guggenheim museora bertaratu gara bertan ospatu den "Longebitatearen Ekonomia eta Zainketen Ekonomia" topaketa salatzeko.
— ITAIA (@itaiasarea) February 1, 2023
🎥⬇️ pic.twitter.com/GY9vEwhTmy
