Urriaren 2an, Maritxu Kajoi egunean, talde-bortxaketa bat izan zen Arrasaten (Gipuzkoa): 14 urteko neska bat bortxatu zuten bi gizonezkok. Eibarko (Gipuzkoa) epaile batek erabaki zuen biak aske uztea, eta haietako batek ihesera jo du. 33 eta 20 urte dituzte bortxatzaileek.
Sexu-erasoa gaitzesteko eta indarkeria matxista orori aurre egitera deitzeko, mobilizazio bat antolatu zuen Deba Bailarako Itaiak, Emakumeen Antolakunde Sozialistak: atzo arratsaldean izan zen, Arrasateko plazan, eta jende ugari bertaratu zen. "Ozen oihukatu dugu ez dugula inolako erasorik onartuko eta indarkeria matxista kasuen aurrean kaleak hartuko ditugula", adierazi zuen Itaiak.
