Ikerketa Sozialisten Institutuak (ISI) hilabete honetan jakinarazi du Ikerketa Estrategikoen argitalpen-ildo bat izango duela martxan. Ikerketa horietatik lehena argitara atera du jada: hurbiltze-saio bat egin du Euskal Herriko klase sozialen kuantifikaziora, "proletariotzaren eta proletarizazioaren gaineko analisi" baten barruan. ISIren web-orrian irakurgai dago aurreneko argitalpen hori, osorik.

Aurreneko ikerketa horren ondorio nagusiak aurkezteko, saio bat egin zuten ISIko hainbat kidek aurreko ostiralean. Arratsaldez, La Bolsan egin zuten aurkezpen-saioa. Ondorio nagusien artean, institutu marxistak jakinarazi du proletarioa dela Hego Euskal Herriko biztanleriaren %56.

Joan den urtarrilean aurkeztu zuten ISI, Euskal Herriko Kontseilu Sozialistaren (EHKS) ikerketa aurreratuen erakundea. Bi helburu nagusi ditu institutuak: "Estrategia Sozialista Berriaren funtsatze teorikoan aurrera egitea", eta "EHKSren ildo politikoa taktikoki zehazteko euskarri zientifikoa izatea".