Araba eta Bizkaiko Gazte Topaketa Sozialistak, apirilaren 5etik 7ra Laudion

Gazte Koordinadora Sozialistak apirilaren 5etik 7ra, Laudion burutuko dituen Topaketak aurkeztu ditu gaur. Ildo politiko sozialistaren baitan “bizitzaren momentu guztiak politizatu eta borroka komunitatea elikatzeko” egitarau oparoa osatu dute.

“Gizarteak sortzen duen despolitizazioaren aurrean guri bizitza politikoa sustatzea dagokigulako antolatu ditugu topaketa hauek. Gure bizimodua bizimodu politikoa da eta gure bizitzaren momentu guztiak norabide horretan lerrokatu behar ditugu”. Horrela mintzatu da GKS, aurkeztu berri duten twitter kontuan publiko egin duen komunikatuan. Zentzu horretan antolatu ditu, “bizimodu kolektibo eta politiko sozialista elikatzeko helburuz”, Laudion, apirilaren 5etik 7ra ospatuko diren Araba eta Bizkaiko Topaketak.

Bertan, babes sare ezberdinei buruz, gazte problematika klase ikuspegitik aztertzearen beharraz, elkartasuna antolatzearen edota saretzearen beharraz, edota harreman eredu komunistaz eta kulturaren klase izaeraz jardungo dira, besteak beste.

Lehen ekimen publiko honetan, bizimodu “politiko eta kolektiboa” elikatu nahi dute beraz; arazoei erantzuteko “modu eraginkor bakarra” horixe dela sinestuta. Hain zuzen, “bere egoeraren jabe den eta heburu argien baitan antolatuta dagoen” kolektiboaren beharra azpimarratu dute. Era berean, “printzipio etikoetan” oinarritutako harreman ereduak sustatu nahi dituzte, klase etsaiaren oldarraldi etengabeari aurre egiteko babesa antolatzea “esentziala” dela iritzita.

Egitarau oparoaz gain, bertan otorduak egin eta gaua pasatzeko aukera ere egongo dela jakinarazi dute. Era berean, eskaintza kulturalari dagokionean “borroka komunitatea sendotzeko” jolasak, bertso afaria eta Ziakhus rap taldearen diskaren aurkezpena izango dira, besteak beste. Topaketotan Bonoak 15€tan jarriko dituzte salgai datozen egunetan publiko egingo dituzten saltokietan; diru hori Topaketen gastuei aurre egitera bideratuko da.

Gazte Koordinadora Sozialistaren komunikatua, hemen