Pedro Sanchez Espainiako Gobernuko presidente eta PSOEko idazkari nagusiak agerraldia egin zuen atzo arratsaldean alderdiaren egoitzan, Madrilgo Ferrazen, Santos Cerdanek Antolaketa idazkari kargua utzi ostean, Guardia Zibilaren Unitate Zentral Operatiboak (UCO) egindako txostenaren ondorioz. Izan ere, Cerdan Koldo Auzia deiturikoarekin lotzen du ikerketak, ezkutuko ordainketak kudeatzen zituen pertsona bera zela seinalatuz, nagusiki.

Hitzaldian, Sanchezek baztertu egin zuen hauteskundeak aurreratzea, eta barkamena eskatu zien "herritarrei eta PSOEren jarraitzaileei". "Gaur goizera arte Cerdanen osotasunaz konbentzituta" zegoela ziurtatu zuen prentsaurrekoan, baina zantzu berriak "oso larriak" direla-eta, bere dimisioa eskatu zuen. Presidenteak iragarri zuenez, "alderdiaren kontuei buruzko kanpo-auditoria" bat egingo dute eta PSOEren zuzendaritza "berregituratuko" dute, eskandaluak eragindako barne-krisiari erantzuteko.

Sanchezek azpimarratu zuen: "Inoiz ez genuen berarengan konfiantza izan behar". Hala, alderdiak "gardentasunez" eta "justiziarekin elkarlanean" jokatuko duela defendatu zuen. "Zoritxarrez, mundu honetan ez dago zero ustelkeriarik, baina zero tolerantzia egon behar da hori gertatzen denean", zioen presidenteak agerraldian.

Oposizioaren erreakzioak azkar iritsi ziren: Alderdi Popularrak hauteskundeak aurreratzea eskatu zuen, eta seinalatu zuen Sanchezen agerraldiak "zentzua" izango lukeela "soilik Gorteen desegitea iragartzeko baldin bazen". Voxek, bestalde, zentsura-mozioa aurkezteko eskatu zion PPri. Gertatutakoak, beraz, ziurgabetasun politikoko aro berri bat ireki du PSOEn, Espainiako Gobernuan eta Espainiako Estatuko politika instituzional osoan.

Atzoko agerraldiaren ondorengo galdera-sortan, Sanchezek garrantzia kendu zien Cerdanek 2014ko primarioetan azpijokoz emandako bi botoei, PSOEren primarioak "berme osoz" egiten direla eta "17.000 boto baino gehiagorengatik" irabazi zuela nabarmenduz. Gainera, ukatu egin zuen polemikak gobernu-krisia eragin duenik.