Pertsona bat jo, lurrera bota eta atxilo eraman zuen Ertzaintzak, eta biluzik izan zuten gero ziega batean. Gero hainbatetan eskaini zioten erruduna zela adierazteko agiri bat sinatzea. Erasoa jasan zuen pertsonaren amak salatu du gertatutakoa, eta azaldu du tratamendu berezi baten beharra duela semeak.
Polizia-eraso baten berri ematen duen gutun bat argitaratu zuen
Tolosaldeko Ataria-k atzo arratsaldean. Gutunaren arabera, urriaren 13an,
Tolosako (Gipuzkoa) Trianguloa plazan, ertzainek pertsona bat
geratu eta identifikatzeko eskatu zioten 21:30ak aldera. Antza, agenteen jarrera "oso
oldarkorra eta agintzailea" izan zen uneoro.
Gutun horretan kontatzen denez, poliziek jo egin zuten atzemandako pertsona hori; lurrera bota zuten eta belaunak
bizkarrean jarri zizkioten eskuburdinak jartzeko. Errefortzuak ere
eskatu zituzten ustez "arriskurik ez zekarren egoera" kontrolatzeko.
Ez
zen hor amaitu, ordea, gutunak azaltzen du herritarra komisariara
eskuburdinak jarrita eraman zutela eta biluzik eduki zutela ziega
batean. Han zegoela hiru aldiz eskaini omen zioten agenteei eraso
egiteagatik erruduna zela onartzeko agiri bat sinatzea —antza,
horietako bat, ofiziozko abokatu baten aurrean—; ez zuen sinatu, ordea.
Azkenean, "modu txarrean" askatu omen zuten goizaldeko 02:00etan.
Eskutitzak azaltzen du, bestalde, tratamendu baten pean dagoela erasotua izan zen pertsona, "behar ezberdinak eta bereziak" dituelako. Jasotako elkartasun keinuak direla-eta eskerrak emanez amaitzen da gutuna, eta erasoa jasan zuen pertsonaren amak sinatzen du.
