AKTUALITATEA EDITORIALA IKUSPUNTUA LANGILE ZIENTZIA KOLABORAZIOAK AGENDA GEDAR TB ARTEKA
Argazki Nagusia
Urola Kostako GKSren aurkezpen jardunaldiak, Zarautzen. Argazkia: Urola Kostako GKS
2021/02/10 16:10

Urola Kostako Gazte Koordinadora Sozialistak urtarrilean jarri zuen martxan Haserrea antolatu, askatasunak hedatu kanpaina. GKSko kideek bi auzi nagusiri egin zieten azpimarra, pandemia testuingurua behatuta. Batetik, salatu zuten gazteria "kriminalizatzen" ari direla hainbat mekanismoren bidez, nagusiki, masa-hedabideen bidez. Hala, "pandemiaren ardura gazteen gain jarri" nahian ari direla diote: "Langile belaunaldi berriak diziplinatzeko saiakeraren isla gisa ulertu behar dugu hori ere".

Bestetik, bigarren auzi bat ere seinalatu zuten kanpainaren bidez: osasun-larrialdiaren aitzakiapean, "kontrol soziala eta poliziaren jazarpena nabarmen hazten" ari direla azaldu zuten. "Pandemia baliatu dute eskubide politikoak murrizteko, jazarpena nahiz isunak areagotzeko eta kontrolerako mekanismoak garatzeko", esan zuten. Gainera, "horren normalizaziorako esku-hartze ideologiko gogorra" ere "etengabea" dela ohartarazi zuten, horren adibide modura aipatuz, besteak beste, aurretik azaldutako "kriminalizazio" saiakera horiek guztiak.

Hitzaldia eta tailerra

Bigarren auzi hori, hau da, "kontrol soziala eta jazarpen poliziala" lantzeko, bi saio prestatu dituzte hurrengo asterako, Zarautzen (Gipuzkoa) bata eta Zumaian (Gipuzkoa) bestea. Otsailaren 19an izango da Zarauzko saioa: Kontrol soziala segurtasunaren izenean hitzaldia. "Kontrol sozial orokortua" eta horrek "osasun-larrialdiari aurre egiteko estrategia gisa" duen "izaera politikoa" aztertuko dituzte hitzaldi horretan. Zarauzko Putzuzulo gaztetxean izango da, 18:00etan.

Otsailaren 20an emango diote jarraipena egitarauari, Zumaiako Torreberri gaztetxean. Hain zuzen, aholkularitza juridikoa eskaintzeko tailer bat egingo dute. Helburua izango da polizien "jokabide arbitrarioen aurrean babestu ahal izateko oinarrizko informazioa partekatzea", hainbat galdera abiapuntu hartuta: "Noiz eska diezadakete identifikatzeko? Nola jokatu tentsio egoera baten aurrean?". 17:00etan hasiko da tailerra.