Aktualitatea
Pikutara mugimenduak Lizarrako Udaltzaingoaren jazarpena eta isunak salatu ditu
Pikutara mugimendu antierrepresiboak deituta, herrian jasaten ari diren errepresioa salatu zuten ostiralean Lizarran (Nafarroa), elkarretaratze bidez. Pikutarako kideen esanetan, polizia-indarren artean, udaltzainak ari dira izaten jazarpena modu nabarmenenean gauzatzen ari direnak.
Argazkia: Pikutara
2020/12/07
09:57
Hainbat eta hainbat lagunek bat egin zuten ostiralean, abenduak 4, Lizarrako (Nafarroa) Pikutara mugimendu
antierrepresiboak antolatutako elkarretaratzean. Pikutarako kideek azaldu dutenez, azken hilabeteetan 30 pertsona baino gehiago identifikatu dituzte Lizarran jardun politikoa egiten ari zirela.
Pikutarak ohar bat zabaldu berri du sare sozialetan, eta bertan nahiz ostiraleko protestan salatu dute, bereziki, Lizarrako Udaltzaingoaren jarrera oldarkorra. Izan ere, hamar pertsona baino gehiagori ezarri diete isuna udaltzainek.
Talde antierrepresiboko kideek adierazi dutenez, Lizarrako Udalaren "garbiketa ordenantzak" aukera ematen die udaltzainei, kartelak eta pankartak ipintzeagatik, isunak jartzeko. Ordenantza kritikatzeaz gain, Pikutarak gaitzetsi du udalak inolako argudiorik gabe utzi duela bertan behera isun bati lotuta aurkeztutako helegite bat, hainbat froga barne hartzen zituena.
Bestalde, duela zenbait aste Lizarrako gazte batek
jasandako mehatxuak ere salatu zituzten ostiralean. Udaltzain batek esan zion, hain zuzen, "jendea
aurrean zegoelako ez zuela kolpatuko".
