Lanuzteak egiten ari dira Gasteizko Detesan, langile berrienen soldatak igotzeko

Langile batzordeak salatu du aldi baterako kontratuak dituztela beharginetako askok, "egiturazko lanak egin arren". Gainera, azkena sartzen diren langileek lan beragatik gutxiago kobratzen dutela azaldu dute, eta urteak pasatu behar izaten dituztela gainerakoen soldata bera eskuratzeko. Lanuzteak egiten ari dira aste osoan zehar.
Argazki Nagusia
Argazkia: ELA
2020ko urtarrilaren 22a

Lan baldintzak hobetzeko hitzarmen baten aldeko borrokan dira Gasteizko (Araba) Detesa lantegiko beharginak. Astelehenean hasi ziren geldialdiekin, eta gutxienez ostiralera arte jarraitzeko asmoa dutela adierazi du langile batzordeak. Aldi baterako kontratuen tasa handia salatu dute, besteak beste, eta azaldu dute kontratu finkoarekin egon beharko luketela guztiek, "egiturazko lanak" egiten dituztela-eta.

Gainera, egoera horretan, langile berrienek gainerakoek baino soldata txikiagoa kobratzen dutela gaitzetsi dute, eta urteak pasatu behar izaten dituztela gainerakoen baldintza berberetan aritzeko. Enpresaren ezezkoen aurrean, lan baldintzak hobetzeko borrokan jarraituko dutela ziurtatu dute beharginek.