AKTUALITATEA EDITORIALA IKUSPUNTUA LANGILE ZIENTZIA KOLABORAZIOAK AGENDA GEDAR TB ARTEKA
Argazki Nagusia
Argazkia: I-GAS
2020/05/18 15:05

Duela bi aste, Gasteizko (Araba) zenbait institututan inkesta kanpaina abiatu zuen Ikasleon Gasteizko Autodefentsa Sareak (I-GAS), beste hainbat eskualdetan egin den bezala, salbuespen egoerak hezkuntza eremuan eta ikasleengan izan duen eragina aztertzeko. Hain zuzen, DBHko eta batxilergoko ikasleei zuzendu zien galdetegia, eta testigantzak ere bildu dituzte. 880 erantzun jaso dituzte.

Inkesta bete duten ikasleen %83k lan karga areagotu dela adierazi du, "etxerako lan gehiago" bidali dizkietelako, eta lanak aurkezteko epemuga "zorroztu" egin dela uste dute %66ek. Gainera, hautazko irakasgaiek "denbora gehiegi hartzen dutela" diote %54ek, lan karga are gehiago handituz.

Informazio falta dutela salatu dute %80ek, hala nola, ebaluazio irizpideekin lotutako gaietan. Bestalde, metodologia berriari egokitzeko hainbat oztopo mahaigaineratu dituzte: esaterako, %20ek etxean "giroa" ez dela "ikasteko egokia" diote, eta %40ek "arazoak" izan dituzte "baliabide digital/teknologikoekin". Horren guztiaren ondorioz, "antsietatea areagotu" izana nabaritu dute %83k.

ALDARRIKAPEN TAULA

Ikasleek adierazitakoaren inguruan hausnartu ostean, "ikasleriak bizi duen estres eta antsietatea areagotu dela" eta "ikasle ugarik etxean duten egoera ez dela egokia" ondorioztatu dute I-GASeko kideek, eta "oro har hezkuntzatik jasotzen dugun erantzun ezaren aurrean", zenbait aldarrikapen egin dituzte ikasleen bizi baldintzen defentsan:

  • Lan kargaren berehalako murriztea.
  • Lanak aurkezteko epemugak malgutzea.
  • Ordutegi eta egutegiak errespetatzea.
  • Klase presentzialetara ez itzuli behar izatea.

"LABORATEGIKO XAGUAK"

Azkeneko irizpideen arabera, EAEko Hezkuntza sailburuak duela aste batzuk jakinarazi zuen ikastetxeek "hirugarren ebaluazio espezifiko bat" egiteko aukera izango dutela, "hirugarren hiruhilekoan helburuak eta gaitasunak nola lortu diren soilik baloratzeko", eta bestela, "prestakuntza-ebaluazio jarraitu" baten bidez, "azken ebaluazio integratu sumatibo bat" egin ahalko dute. Horren arabera, ikasleen ebaluazioak lehen eta bigarren ebaluazioak izango lituzke oinarri.

Hala, "klase presentzialetara itzultzearen zentzu akademikoa" ez dela "inon ageri" salatu du Gasteizko Ikasle Abertzaleakek, "berreskuratzeko aukera emateko" ez bada, behintzat. Aitzitik, bigarren irizpideari jarraiki, asmoa "hezkuntza eredu honen funtzionamendua baloratzea" dela azaldu du Gasteizko IAk. "Laborategiko xaguak" bailiran, "ikasleak esperimentaziorako" erabiltzen ari direla dio, eta "normalitate berrira egokitzeko" haien "osasunarekin jolasten" ibiltzea gaitzetsi du.

Horren harira, maiatzaren 25etik aurrera greba egitera dei egin du Ikasle Abertzaleakek.