Gasteizko Etxebizitza Sindikatuak birjabetutako espazio baten berri eman du

Etxebizitza Sindikatuak GEDAR LANGILE KAZETAri jakinarazi dionez, "etxebizitza lortzeko beste aukerarik ez zuten 30 pertsona inguruk" Los Herran kaleko espazio bat birjabetu zuten aurreko astean. Atzo, legez kanpoko desalojo saiakera gelditzea lortu zuten.
Argazki Nagusia
2020ko uztailaren 3a

Etxebizitza baterako beharra asetzeko asmoz, kale gorrian zeuden dozenaka pertsonak Gasteizko (Araba) gune bat birjabetu zuten duela astebete, Etxebizitza Sindikatuak kazeta honi jakinarazi dionez. Hain zuzen, Arabako hiriburuan kokatuta dagoen espazio batera sartu ziren, Los Herran kaleko 15. zenbakian, hamar urtez hutsik eta erabili gabe egon den eraikinean.

Pertsona hauek babesteko hautua egin du Etxebizitza Sindikatuak. Eraikinaren zein kideen babeserako, defentsarako eta mantenurako dituen tresnak eskaini ditu, helburutzat jota horiek "modu egoki batean antolatzea eta instituzio publikoetatik baztertu den etxebizitza beharra modu duin batean bermatzea".

Legez kanpoko desalojo saiakera gaur

Arratsaldean, bertan bizi direnak zein laguntzera joan ziren zenbait pertsona espazioa atontzen ari zirela, eraikinaren portalera sartu zen Ertzaintza, jabeekin eta sarrailgile batekin batera, birjabetutako espazioetatik botatzeko. Etxebizitza horietan bizitzen astebete baino gehiago daramatenez, bertakoek argi utzi zieten poliziei legez kanpoko desalojo bat gauzatuko zutela. Azkenean, etxebizitzak okupatuta zeudela ziurtatu eta alde egin zuten.