Amerikako Estatu Batuetako presidente Donald Trumpek agindu du Guardia Nazionaleko 2.000 soldadu hedatu daitezela Los Angelesen (Kalifornia), Immigrazio eta Aduana Zerbitzuaren (ICE) sarekadak salatzeko mobilizazio jendetsuak izan ostean. Gavin Newsom gobernadorearen bulegoaren arabera, gutxienez 300 soldadu daude hiriko hiru tokitan igande goizaldetik, asteburuan izandako protestei erantzuteko, batez ere 101 autobidean eta metropoliko atxiloketa-gunearen inguruan. Armadako Ipar Komandoak baieztatu du Kaliforniako Infanteriako 79. brigadakoak direla esku hartu duten soldaduak, eta martxan jarraituko dutela migrazio-sarekaden kontrako protestek aurrera jarraituz gero.

Manifestazioak migrazio-sarekada batzuen ondoren hasi ziren. Protestetan autobideak blokeatu zituzten, ibilgailuak erre zituzten eta konfrontazioak izan ziren polizia-indarrekin. Manifestarien kontra gas negar-eragileak, gomazko balak eta zorabiatzeko granadak erabili zituen Poliziak, mobilizatutako jendetza sakabanatzeko.

Karen Bass alkateak esan zuen "Los Angelesen ikusten ari garena gobernuak eragindako kaosa" dela. Bestalde, Newsom gobernadoreak adierazi zuen "Estatuaren subiranotasunaren urraketa larria" dela Guardia Nazionalaren interbentzioa, eta Etxe Zurira bidalitako gutun baten bidez, soldaduak erretira daitezela eskatu zuen formalki.

Kalifornia Hegoaldeko Askatasun Zibilen Batasun Estatubatuarrak (ACLU), bestalde, iragarri zuen gobernuaren neurriaren aurkako ekintza legalak aztertzen ari dela, Guardia Zibilaren interbentzioa Estatuko biztanleen aurkako "errepresalia argia" eta "gerra-deklarazio" bat dela azalduz. Bitartean, tentsioak jarraitzen du hirian, mobilizatutako milaka pertsona eta areagotzen ari den presentzia militarra tarteko.