Hiru pertsona atxilotu dituzte Bizkaian, Nikaraguako hainbat emakume esplotazio-sare batean salerosteagatik

Nikaraguako Somoto herria eta Arratia bailara lotzen zituen sareak. Behin Euskal Herrira mugitzean, emakumeei 10.000 euroko ustezko zorra exijitzen zieten esplotatzaileek. Zor hori kitatzeko hainbat etxeko lan egitera behartzen zituzten.
Argazki Nagusia
Argazkia: irekia.eus
2021eko martxoaren 30a

Nikaraguako hainbat emakume esplotatzen zituzten hiru pertsona atxilotu dituzte Bizkaian; bi emakumezko eta gizonezko bat. Arratia bailararen eta Nikaraguako Somoto herriaren artean errotzen zen esplotazio-sarea.

Ikerketaren arabera, gehienetan 20 eta 40 urte arteko emakumeak atxikitzen zituzten. Legez kanpoko bidaiak antolatu eta Euskal Herrira mugiarazten zituzten esplotatzaileek, eta hona iristean, 10.000 euro inguruko ustezko zorra eskatzen zieten. Modu horretan behartzen zituzten kontratu bat izenpetzera, zor hori etxeko lanak eginda kitatzera behartuz. Antza, atxilotuek hogei emakume inguru salerosi dituzte Espainiako Estatuan 2017tik hona.

Iazko azaroan martxan jarritako Bueltaka operazioaren barruan gauzatu dituzte hiru atxiloketak, eta Bizkaiko etxebizitza bat ere miatu du poliziak oraingoan. Atxikitutako hiru pertsonak epailearen esku geratu ziren asteazkenean.

Talde kriminal bateko kide izatea leporatzen diete; hain zuzen, talde kriminal horren bidez pertsonen legez kanpoko trafikoan aritzea, legez kanpoko immigrazioaren alde egitea eta lan-esplotazioa helburutzat duen giza-salerosketan parte hartzea egozten diete.