Europar Batasuneko potentzia nagusiak, estanflaziotik urrats batera

Aktualitatea / KRISI KAPITALISTA

BPGaren hazkunde apala eta inflazio-tasa altuak ageri dira batasun ekonomikoko estatu gehienetan. Kontinenteko ekonomia indartsuenek ere "kontrakziorako arriskua" dutela ohartarazten dute adituek. EBko BPGa %0,4 baino ez da hazi 2022ko lehen hiruhilekoan, eta inflazioaren urte arteko aldakortasun-tasa %8,1etik gorakoa da jada.

2022/06/02 22:48

Estanflazioan jausteko mehatxua nabarmena da dagoeneko Europar Batasunean. Zenbait ekonomialarik aurretiaz ohartarazi bazuten ere, arriskua inoiz ez omen da izan orain bezain egiazkoa; batik bat, euroguneko lau ekonomia handientzat: Alemania, Italia, Frantzia zein Espainiako estatuak, alegia.

elEconomista hedabideak kontsultaturiko adituen iritziz, "herrialde batek aurre egin diezaiokeen anomalia ekonomikorik handiena" dator; hau da, Barne Produktu Gordinaren (BPG) aurrerapen ñimiñoak nahiz atzeraldiak, Kontsumorako Produktuen Indiziaren (KPI) tasa errekorrekin batera. Zantzuok estatukide gehienetan urtarriletik martxora bitartean azaldu ondoren, hiruhileko honetan finkatu direla ikus daiteke.

Estanflazioaren iragarleek arrazoi

Europako testuinguru ekonomikoaren datu guztiak mahaigaineratuta, "eurogunean edo EB osoan epe motzean estanflazioaz hitz egiten dutenek arrazoiaren zati bat dute", aitortu dio Bruselako Bruegel Institutuko zuzendariorde Maria Demertzisek elEconomista-ri. Izatez, ezkutaezina da jada EBk hazkunde-tasa ahulei eta prezio altu iraunkorrei "denbora batez" aurre egin beharko diela.

Hazkunde baxuekin jai

Beste aditu batzuek ohartarazi dutenez, BPGaren gutxitzea ez da beharrezkoa izango estanflazio egoerara iristeko. "Inflazioak altu jarraituz gero eta hiruhileko arteko hazkunde nuluak edo apiriletik ekainera bitartean bezalako zero koma tartekoak berriro topatzen baditugu, egoera zailean egongo gara", esan dute inbertsio funtsen aholkularitzan aritzen diren Nextep Finance erakundeko adituek.

Aurrerapen ekonomiko txikiok Alemanian eta Italian sumatu dira gehien; izan ere, ekonomialari, politikari zein hedabide batzuk "atzeraldia ekidin izanagatik" kontsolatzen badira ere, hurrenez hurren, %0,2 eta %0,1 hazi da bi herrialde horietako BPGa urtarriletik martxora bitartean.

KPIaren tasak, berriz, %7,8ra iritsi dira Alemaniaren kasuan, eta % 6,3ra, berriz, Italian. Are okerragoa da Frantziako Estatuaren kasua, bere ekonomiak ez baitzuen 2022aren hasierako koxka gainditu. BPGa bi hamarren jaitsi zen 2021eko azken hilabeteekin alderatuta.

Espainiako Estatua, oso ahul

Langabeziaren aurreko zifra kaxkarrak kuantitatiboki hobetu direla maiz aipatu den arren, Espainiako Estatuak 2019ko BPGaren maila berreskuratu ezinik jarraitzen du. Gauzak horrela, "egoera estanflazionistan murgiltzeko arrisku handiena duen estatua" dela uste dute zenbait adituk.

%0,3 igo da bere BPGaren hiruhileko arteko aldakortasun-tasa (Alemaniarena, Italiarena eta Frantziarena baino gehixeago), baina, hala ere, oraindik ez da gai besteen antzera pandemiaren aurreko BPG maila berreskuratzeko. Portugaleko BPGak, esate baterako, %2,6ko hazkunde-tasa izan du urtarriletik martxora bitartean.

Espainiako Estatuaren kalteberatasun bereziaren gakoa "zor publikoaren bolumen handian" datza ekonomialari askoren iritziz. Datozen urteetan zor hori BPGaren %140ra iristeko bidean izango dela uste da, Europako Banku Zentrala, hamaika urteren ostean, interes-tasak igotzen hasiko den une berean.