Europar Batasunak "jarrera argi" bat hartzeko eskatu die Amerikako Estatu Batuei, Donald Trumpen administrazioak bultzatutako muga-zergen igoera geldiarazteko negoziazioan. Washingtonen izandako azken bilera sortaren ondoren, Maros Sefcovic Europako Merkataritza komisarioa Bruselara itzuli da, aurrerapen posibleen zantzu zehatzik eman gabe.

Olof Gill bozeramaileak azaldu duenez, "EB bere zatia egiten ari da", eta orain "elkarrekiko konpromisoak" espero ditu. Bruselak "muga-zerga industrialak kentzea eta altzairuaren eta aluminioaren gehiegizko gaitasun globala eztabaidatzea" proposatu du, baina AEBen aldetik "bide-orri argi baten falta" dagoela salatu du.

Aldi berean, Europako Batzordeak berretsi du ez dagoela "amore emateko prest" Trumpek negoziazio-agendan sartu nahi dituen hainbat auzitan, hala nola, Balio Erantsiaren gaineko Zerga (BEZ). Segurtasunari eta osasun-arloari buruz Europar Batasunak dituen estandarrak aldatzeko prestutasunik ere ez du, EBko iturriek El País egunkariari baieztatu diotenez.

Joan den astean 90 eguneko su-eten partziala adostu bazuten ere, produktu farmazeutikoei eta mikrotxipei muga-zerga berriak ezartzeko izapideak hasi dituzte AEBek. Neurri horiek, EBko diplomatikoen arabera, "ziurgabetasun giroa" sortzen ari dira, eta horrek zaildu egiten du Atlantikoaren bi aldeetan merkataritza-plangintza zehaztea.

Bien bitartean, Europako Batzordeko presidente Ursula Von Der Leyenek harremanak areagotu ditu Akordio Transpazifikoko (CPTPP) eta beste ekonomia batzuetako kideekin, EBren merkataritza-loturak dibertsifikatzeko ahaleginean. Halaber, 2023an onartutako "koertzioaren aurkako tresna" aktibatzea aurreikusten du Bruselak, hirugarren herrialdeek legez kanpokotzat jotzen dituzten presio ekonomikoei erantzuteko. "Errepresalia neurriak lantzen jarraitzen dugu", baieztatu dute EBko iturriek.