Salatu dute emakume langile bat arrazakeriagatik baztertu dutela lanpostu batetik, Lizarran

Atzo elkarretaratzea egin zuten Lizarrako Juguettos dendaren aurrean, emakume batek arrazakeriagatik jasandako bazterkeria salatzeko. Ijito etniakoa da behargina eta, gaitzetsi dutenez, enpresak uko egin dio Empleo Mujer programaren barruan hura kontratatzeari.
Argazki Nagusia
2021eko urtarrilaren 5a
Emakume langileak idazki bidez azaldu du Lizarran (Nafarroa) gertatutakoa. Irailean, administrazio publiko desberdinek bultzatutako "komertzio ikastaro" batean eman zuen izena. Behin ikastaroko atal teorikoa amaituta, praktikaldi modura izendatutakoa Juguettos enpresan egitea eskatu zuen emakumeak eta, antza, "praktikak" egin ostean, lan-kontratu bat egiteko kompromezua ere hartua zuen enpresak, Empleo Mujer programaren barruan.

Praktikaldia deritzona hasteko bi egun geratzen zirenean, ikastaroko koordinatzaileak hots egin zion emakume langileari, eta jakinarazi zion negozioko buruak ez zuela nahi hark praktikan Juguetton egiterik. Nagusiak esan zuen ez zuela Amador Jiménez abizenak dituzten pertsonak jasotzeko asmorik.

Emakumearen esanetan, "Lizarran mundu guztiak badaki Amador eta Jiménez abizenak ijitua izatearen sinonimoak direla" eta "Lizarran dozenaka pertsonak dituztela abizen horiek". Horren ostean, "lotsatuta" egon zela dio, bai eta "mespretxatuta sentitu" zela ere.

Azkenean, egoera salatzea erabaki eta protestara jo zuen: atzo, astelehena, elkarretaratzea izan zen Juguettosen aurrean, Gazkalo, SOS Arrazakeria Nafarroa eta LAB sindikatuak deituta. Hala, kasu zehatz horretaz haragi, ijito etniako pertsonek hainbat eta hainbat bizi-arlotan bizi duten bazterkeria ere salatu zuten.

Itaia eta GKSren babesa

Lizarraldeko Itaiak eta Gazte Koordinadora Sozialistak babesa adierazi diote emakumeari eta elkarretaratzera bertaratzeko deia luzatu zuten atzorako. Eskualdeko Itaiak "inolako gutxiespenik" eta "emakume langileon aurkako eraso bakar bat ere" ez duela onartuko adierazi zuen. "Langileen artean etengabeko lehia sustatzen dutenen aurrean", "langileon arteko elkartasuna hedatzeko" hautua kontrajarri zuten Itaiako kideek, eta "gaurdanik halako jarrerak seinalatzearen eta horiei aurre egitearen" garrantzia ere azpimarratu zuten.