Preso bat eraila Zaballan, urteko laugarrena espetxe berean

Bart aurkitu zuten hilda 28 urteko presoa, Zaballako espetxeko bere ziegan. Hilabete honetan presondegi berean hil den bigarren presoa da, eta aurtengo laugarrena: apirilaren 1ean 24 urteko atxilo bat urkatuta agertu zen bere ziegan. Bere buruaz beste egin izanaren baieztapenaren aurrean, senideek zalantzak azaldu zituzten: "Argi diogu espetxeko heriotzak ez direla naturalak eta ekidingarriak direla". Erailketaren hurrengo egunetan, gorputza ikusteko zailtasunak salatu zituzten; 5 egun behar izan zituzten gorpua ikusi ahal izateko.
Argazki Nagusia
Zaballa espetxea
2019ko apirilaren 26a

Dagoeneko lau dira 2019. urtea hasi zenetik Zaballako (Araba) espetxean hildako presoak. Ez dute zehaztu zein izan diren heriotzen arrazoiak, nahiz eta lautik bi heriotzek suizidio kasuen zantzuak dituztela dioten espetxe barruko iturriek. Salhaketa taldeak, ordea, datu horiek "hipotesi soilak" direla uste du. Herri eragileak irmoki salatu ditu gertaerak, eta esan du "aurreikusitako heriotzen kronika" direla jazotakoak. Gainera, beste hainbat kasu isilean pasatzen direla uste du Salhaketak.

Hala Bedi-k jakinarazi duenez, 28 urteko gazte bat da Zaballako azken hildakoa, eta gauean agertu da eraila Zaballako espetxeko bere ziegan. Urte honetan espetxe berean hil den laugarren presoaren erailketak alarmak piztu ditu. Izan ere, apirila hasieran Zaballan urkatuta agertu zen atxiloaren senideek prentsa aurrean mahaigaineratutako neglijentzia nabarmenek indarra hartu dute gaurkoan. Salhaketak salatu duenez, erailketa horietako asko droga-mendekotasunak eragindako suizidioekin lotuta daude. Plazaratu dituzten datuen arabera, "espetxean daudenen %80ek droga mendekotasuna dute".