Atzo, hilak 25, oso larri zauritu zen 46 urteko behargin bat, Lesakan (Nafarroa). Transformados Zalain enpresan gertatu zen istripua, 13:15ean, gutxi gorabehera.

Lantokira bertaratu ziren osasun-langileak zein Polizia, eta zauria buxatzen ahalegindu ziren. Dena den, Donostiako (Gipuzkoa) ospitalera eraman behar izan zuten behargina, bertan artatua izan zedin.

2016. urtean 54 urteko langile bat izan zen eraila Lesakako Transformados Zalain enpresan. Bakarrik zegoen behargina hodientzako apalak dituen gune batean, eta azaldu zutenez, ziur asko lurrera erori zen altuera batetik.

Etenik ez

Hilabete honetan ere hainbat eta hainbat langile zauritu izan dira Euskal Herriko lantegitan. Esaterako, hilaren 7an behargin bat zauritu zen Lasarten (Gipuzkoa) soldatapean lanean ari zela, eraikitzen ari diren eraikin batetik amilduta. Hilaren 9an, Urduñan (Bizkaia) jazo zen lan istripu bat: langile bati kamioi bateko paleak erori zitzaizkion gainera, eta ospitalera eraman behar izan zuten helikopteroan.