Loiu eta Barazarren gertatutako langileen heriotzak salatu dituzte

Atzo langile bat erail zuten Aceros Olarra enpresan, eta gaur, egun osoko lanuztea egin dute bere lankideek. Bestalde, Barazarren izan zen lan erailketa salatzeko, hainbat sindikatuk elkarretaratzea deitu dute biharko, Eusko Jaurlaritzaren aurrean.
Argazki Nagusia
Argazkia: Naiz
2019ko maiatzaren 23a

Atzo, asteazkena, bi langile erail zituzten, Barazarren (Bizkaia) eta Loiun (Bizkaia). Hain zuzen, Barazargo mendatean elkar jo zuten bi kamioik, eta hil egin zen gidari modura lanean ari zen beharginetako bat; ordu batzuk beranduago, Loiuko Olarra enpresan garabian zeraman zama gainera erortzean hil zen beste langile bat. Azken erailketa horren harira, lankideek egun osoko lanuztea egin dute gaur Olarran.

Bestalde, Barazarren jazotakoa salatzeko, biharko elkarretaratzea antolatu dute Bilbon (Bizkaia), 11:00etan Eusko Jaurlaritzaren aurrean. Hainbat sindikatuk egin dute deialdia, eta “doluminak eta elkartasuna” adierazi dizkiete eraildakoen senideei.

Aurten dagoeneko 21 langile erail dituzte Euskal Herrian; horietako bost aste honetan. Sindikatuek salatu dutenez, errepidean gertatzen dira lan istripu gehien, eta arduradun politikoei erantzukizunak eskatu dizkiete.