Gutxienez bi eraso matxista salatu dituzte asteburuan Euskal Herrian

Iragan asteburuan, gutxienez bi indarkeria matxista kasu salatu dituzte Euskal Herrian. Batetik, Galdakaon bikotekide ohiari eraso egin dio gizonezko batek, arma elektriko bat erabilita. Bestetik, Gasteizen, emakume batek jakinarazi du tratu txarrak jasaten ari dela bikotekidearen aldetik.
Argazki Nagusia
2020ko martxoaren 30a

Pasa den asteburuan, gutxienez bi eraso matxista izan dira Euskal Herrian, Galdakaon (Bizkaia) bata, eta Gasteizen (Araba) bestea. Ostiralean jazo zen lehenengo erasoa, 19:00ak aldera, Galdakaon: gizonezko batek bikotekide ohiari egin zion eraso, arma elektriko batekin. Emakumeak salaketa jarri ostean, epailearen aurrean deklaratu zuen erasotzaileak, eta kargurik gabe utzi zuten aske. Urruntze agindu bat ezarri diote.

Bigarren erasoa Gasteizen izan zen, Alde Zaharreko etxebizitza batean zehazki. Eraso bakarra izan beharrean, baina, tratu txar jarraituez mintzo gara kasu honetan. Larunbatean izan zen honen berri, Gasteizko Udaltzaingoa emakume baten etxera bertaratu zenean bere jabetzaren inguruko jakinarazpen bat helarazteko. Une horretan, bere jarrera zela-eta (urduritasun orokortua eta etengabeko negarra), etxetik jaitsiarazi zuten udaltzainek, eta hala jakinarazi zuen emakumeak tratu txarrak jasaten ari zela. Erasotzailea atxilotu zuten orduan; 27 urte ditu.