Gasteizko lokal batean emakume bati sexu-erasoa egin dio gizon batek

18 urte ditu erasotzaileak, eta atxilo eraman zuten. Itaiak mobilizatzera dei egin du biharko, Gasteizen azken egunetan argitara atera diren erasoak salatzeko.
Argazki Nagusia
2021eko martxoaren 21a

Hainbat hedabidek atzo jakinarazi zutenez, 18 urteko gizonezko bat atxilotu zuten Gasteizen (Araba), Alde Zaharreko lokal batean emakume bati sexu-erasoa egiteagatik. Atzo goizean igaro zen epailearen aurretik, eta behin-behinean behintzat erasotzailea espetxeratzea erabaki zuen hark.

Gasteizko Itaiak elkarretaratzea antolatu du biharko, astelehena, azken egunetan Araban argitara atera diren erasoak salatzeko. Izan ere, aipatutako sexu-erasoaz gain, aste honetan eman dute aditzera 11 pertsona auzipetu dituztela prostituzio-sare batean parte hartzeagatik. 2016an eman zuten kasu horren berri.

Itaiako kideek dei egin dute bihar 20:00etan Andra Mari Zuriaren plazara bertaratzera, Indarkeria matxistari aurre egin! lemapean protesta egiteko.