Garraiolari bat zauritu da Idiazabalen

"Guraizearena" egin eta N-I errepidean gurutzatuta gelditu da langilea gidatzen ari zen kamioia. Ospitalera mugitu behar izan dute zauritutako behargina. Pasa den astean, bi erailketaren berri eman zuten Euskal Herrian.
Argazki Nagusia
2020ko ekainaren 29a

Gaur, hilak 29, garraiolari bat zauritu da N-I errepidean, Idiazabal (Gipuzkoa) parean. Lakuako Segurtasun Sailaren arabera, 09:45ak aldera izan da lan-istripua: "guraizearena" egin du behargina gidatzen ari zen kamioiak, eta ondorioz, gurutzatuta geratu da bidean. Bertan artatu ostean, ospitalera eraman dute zauritutako langilea.

Aurreko astean, gutxienez bi langile erail zituzten: Iruran (Gipuzkoa) plataforma batetik erorita galdu zuen bizia behargin batek, eta Bermeoko (Bizkaia) atunontzi bateko arrantzale bat Indiako Ozeanoan hil zuten, lan-istripu bat medio zauritu ondoren.