Aske geratu da David Urdin iheslari politiko burlatarra, hamabi urteren ostean

Bi urteko espetxe zigorra ezarri diote Urdini; hala, ez dute kartzelaratuko. Hamabi urte inguruko erbestealdiaren ondoren itzuli da etxera burlatarra, eta joan den igandean entregatu zuen bere burua, Espainiako Auzitegi Nazionalean epaitu zezaten. 2007an atxilotu zuten "kale borroka" leporatuta, eta preso izan zuten 2007 eta 2009 artean.
Argazki Nagusia
Argazkia: @BurlatakoGA
2021eko ekainaren 11a

Etxean da jada David Urdin iheslari politiko ohia. 2007an atxilotu zuten Guardia Zibilak eta Espainiako Poliziak, "kale borroka" eta sabotaje-ekintzak egotzita; torturak jasan izana salatu zuen burlatarrak. Burlatako (Nafarroa) beste lau gazte ere eraman zituzten atxilo. Urdinek hamabost hilabete eman zituen kartzelan 2007 eta 2009 artean eta, fidantzapeko askatasuna lortuta, epaiketaren zain geratu zen 2009an. Espainiako Auzitegi Nazionalak haren aurka irekitako auzian, dena den, fiskaltzak 27 urteko kartzela zigorra eskatu zuen harentzat.

Ihes egin zuen orduan Urdinek, eta hamabi urte inguruko erbestealdiaren ostean itzuli zen etxera aurreko astean. Igandean entregatu zuen bere burua, Espainiako Auzitegi Nazionalean epaiketa egin ziezaioten 2007 baino lehenagoko ekintza horien harira. Akordioa lortu du auzitegiarekin, eta bi urtera jaitsi diote kondena. Modu horretan, beraz, ez dute berriro kartzelaratuko.


Iruzkinak

Ez dago iruzkinik