Amurrioko Inauxako aldi baterako langileak eta Edai ingenieritzako sei langile kaleratuko dituzte

Aldi baterako kontratua duten langileak kalera bidaliko dituzte Amurrioko Inauxan. Gainera, Edai ingenieritza ixtea erabaki dute Mubeak eta Inauxak, eta sei behargin gehiago kanporatuko dituzte.
Argazki Nagusia
Inauxako langileak, 2016an. Argazkia: LAB Industria
2020ko maiatzaren 22a

Aldi baterako kontratua duten langileak kaleratuko dituzte Amurrioko (Araba) Inauxa lantegian, COVID-19ak irekitako agertokiaren aitzakiapean. Enpresak apirilean jakinarazi zien aldi baterako beharginei bukatutzat joko dituela haien kontratuak. Mubea multinazionalaren parte da Amurrioko Inauxa, eta aurki aurkeztuko du aldi baterako lan-erregulazio txosten bat, "indarrezko arrazoiak" direla-eta.

Bestalde, Edai ingenieritza itxiko dutela ere iragarri dute Mubeak eta Inauxak. Haien jabetza da Edai, eta ixtean, sei behargin bidaliko dituzte kalera.