Langile familien aurrezkiak seigarren hiruhilekoz jarraian jaitsi dira Eurogunean. Hitzarmen bidez araututako soldatak %2,8 baino ez dira igo Espainiako Estatuan, urteko batez besteko inflazioa baino hiru aldiz gutxiago. IBEX35eko enpresen irabaziak langile familien dirusarrerak baino %800 aldiz gehiago igo dira.
ARGAZKIA / El Español
Euroguneko familien aurrezki tasa %13,2ra arte jaitsi zen 2022. urteko hirugarren hiruhilekoan, Eurostatek argitaratu dituen datuen arabera. 2021. urteko lehen hiruhilekotik %8,3 jaitsi da aurrezki tasa. Datu horien arabera, Euroguneko langile familien aurrezteko ahalmena %38,6 jaitsi da urte eta erdi eskasean.
Bestalde, eta Espainiako Estatuari dagozkion datuak aztertzen badira, soldataren eta bizitzaren kostuen arteko erlazioak %5,8 egin du behera, langile familien erosteko gaitasunaren kalterako. Zehazki, azken urtean %8,4an kokatu da inflazioaren batez bestekoa eta, aldiz, hitzarmen bidezko soldatek %2,8 eskas egin dute gora.
Errealitate gordin horren beste aldean, IBEX35 osatzen duten enpresen irabaziak daude. Langile familien soldaten bilakaerarekin erlazioan, %800 egin dute gora COVID-19aren agerpenaz geroztik. Beraz, soldata-igoeren puntu bakoitzeko, zortzi puntu igo dira IBEX35eko enpresen irabaziak. Espainiako Estatuko enpresa-sareak, bestalde, %0,2 egin du behera, eta gehienbat bost langile edo gutxiago dituzten enpresen itxierak izan ziren 2022an.
