Enpresa zarratzeko asmotan dago Vianako (Nafarroa) Defontaine Ibericako zuzendaritza, lantokiko jarduera Tunisiara tokialdatu nahi baitu enpresak. Aurreko ostiralean eman zuen asmoen berri; 37 langile kaleratuko lituzke horrekin.
Apirilaren 16an batu zen langileen ordezkaritza enpresako zuzendaritzarekin, eta behargin guztiak kanporatzea eta enpresa ixtea erabaki zuela adierazi zuten zuzendaritzako kideek.
Egoera horren aurrean, apirilaren 26an greba mugagabea hasiko dute Vianako langileek. Ibilgailuak hornitzeko piezak ekoizten dituzte Defontaine Iberican, eta enpresa Frantziakoa izanik, dagoeneko egonkortuta dauka jarduna Tunisian, han jarri dituztelako martxan planta gehienak.
