Euskal Irratiek jakinarazi dutenez, goizeko aurreneko orduan, sei lagun atxilotu ditu Poliziak Urruñan (Lapurdi) eta Baionan (Lapurdi). 06:00ak aldera izan dira atxiloketak: gazteak Baionara eraman dituzte atxilo, eta euren ordenagailuak eta mugikorrak ere hartu dituzte polizia-agenteek.
Jerome Bourrier Baionako prokuradoreak dio "kalteak" eragitea eta Poliziari eraso egitea leporatzen dietela gazte lapurtarrei. Hain justu, erretreten erreformaren kontrako protestetako istiluetan parte hartzea egozten omen diete, bai eta uztailaren 14rako U14 kolektiboak Baionan antolaturiko mobilizazioan (Frantziako Jaiegun Nazionalari kontrajarrita) kalte materialak eragitea ere.
