Gurutzetako Ospitalean (Barakaldo, Bizkaia) emakume bat bortxatu zuen gizon batek aurreko larunbatean. Une horretan, biak zeuden erietxe horretan ospitaleratuta. Dirudienez, gela bateko komunera sartu ziren biak, eta gizonak han egin zion eraso emakumeari. Erizain bati eskatu zion laguntza erasotua izan zen emakumeak, eta gertaturikoa azaldu zion. Atxilo eraman zuten erasotzailea igandean.
Bestalde, zenbait komunikabidek atzo jakinarazi zutenez, Irunen (Gipuzkoa) ere izan zen sexu-eraso bat aurreko asteburuan. Igande goizaldean jarri zuten salaketa bat eraso hori zela-eta.
