Asteartean, irailak 1, langile bat zauritu zen Ordiziako (Gipuzkoa) Urdaneta kaleko eraikuntza lanetan. Antza, erorialdi bat izan zuen soldatapean lanean ari zenean. Suhiltzaileek erreskatatu zuten, eta gero, ospitalera eraman behar izan zuten, han artatua izan zedin.

"Zauritutako beharginari zein bere kideei elkartasuna" adierazi eta lan-istripua salatu zuten Ordiziako Gaztetxeko kideek. "Kasualitate edota egoera bakandu gisa ulertu ezin dugun berria dugu hau. Soldatapeko lanaren bidez, langileriak bizi duen esplotazio egoeraren areagotzearen zantzuak ditugu honakoak; gehiegizko orduak, segurtasun eza, eta abar", adierazi zuten. "Langileoi dagokigu egoera hau iraultzea".

Iragan abuztuaren 21ean 50 urteko behargin bat zauritu zen Trapagarango (Bizkaia) lantegi batean. Urtea hasi zenetik, gutxienez 37 langile erail dituzte haien lanpostuetan Euskal Herrian.