Hilabete baino gehiago igaro da Pablo Gonzalez kazetari nabarniztarra atxilotu zutenetik. Polonia eta Ukraina bereizten dituen mugatik gertu atzeman zuten Poloniako autoritateek, kazetaritza lanetan ari zela. Errusiarentzat espioitza lanak egitea leporatu diote, eta behin-behinean espetxeratu dute; gutxienez maiatzaren 29ra arte izango dute preso Poloniako autoritateek.

Oraindik inkomunikatuta daukate Gonzalez, ez baitiote utzi bere gertukoekin hitz egiten edo egoten, ez eta bere konfiantzazko abokatuarekin harremanetan egoten ere. Espainiako Estatuak Polonian daukan kontsulari soilik utzi diote kazetaria bisitatzen, eta bera bi aldiz izan da espetxean. Kontsularen esanetan, bere kasua salatzeko "presioa" mantentzeko eskatzen du kazetariak.

Europar Batasuneko Oinarrizko Eskubideen Gutuneko hemezortzi artikulu urratu dituzte Poloniako autoritateek Gonzalezen atxiloketan eta kartzelaratzean.

Ofiziozko abokatu bat izendatu zuten kazetariarentzat, baina duela hainbat egun aldatu zuten; orain, ustez, beste ofiziozko abokatu batek darama Gonzalezen defentsaren prestaketa.