Polemika piztu du Iowako (Amerikako Estatu Batuak) Senatuak astearte honetan, errepublikarren babesarekin, onartu duen lege-proiektuak. Haurren soldatapeko lana izan dute eztabaidagai senatariek, eta badirudi are gehiago erraztuko dutela 14 eta 17 urte arteko adingabeek lan egitea. Lege-proiektua onartuko balitz, nerabeak ordu gehiagorako eta sektore gehiagotan kontratatzeko aukera egongo litzateke.

Gaur egun ere legezkoa da 14 eta 17 urte arteko gazteak soldatapean aritzea, lau orduko lanaldiekin. Lege-proiektu berriarekin, baina, lanaldi hori areagotu nahi du Senatuak: nerabeak sei orduz jardutea baimendu nahi du, baita gauez izanda ere. Gainera, orain arte ez zegoen legeztatuta zenbait lanetarako adingabeak kontratatzea, baina "abanikoa" zabaldu nahi dute: esaterako, eraikuntzan, muntatze-kateetan edota hainbat makineriaren erabileran nerabeak aritzea onartu nahi dute.

Konkretura eramanda, adibidez, legeztatu egin nahi dute 14 urteko gazteek gauez sei orduko lanaldiak izatea, 15 urtekoak muntzatze-lerroetan jardutea edota 16 eta 17 urtekoek jatetxeetan alkoholdun edariak zerbitzatzea. Azkeneko horiek, bestalde, helduenak bezain lanaldi luzeak edukiko dituzte lege-proiektua onetsiz gero. Hori gutxi balitz, 14 urteko adingabeei lanerako gidabaimenak ematea aztertuko dute.

Senatari errepublikarren esanetan, adingabeek gaztetatik hainbat lan-gaitasun eskuratzea ahalbidetuko du lege-proiektuak, baita nerabeek "auto bat erosteko, graduaziorako soineko bat erosteko edo udako kanpamentu batera joateko aurreztea" ere. Orain, Ordezkarien Ganberak onartu beharko ditu proposaturiko neurri berriak.