Bestseller Españak, Jack&Jones arropa-markaren jabea den enpresak, langileen greba egiteko eskubidea urratu zuen Gipuzkoan iaz. Hala ebatzi du Donostiako (Gipuzkoa) epaitegi batek, eta aipatutako konpainiak kalte-ordainak eman beharko dizkie grebalariei eta auzitegietan demanda jarri zuen sindikatuari, ELA.
Zehazki, Donostiako Garbera eta Usurbilgo Urbil merkataritza-guneetan urratu zituzten grebalarien eskubideak. Gipuzkoako arropa eta zapata denda ugaritan izan ziren protestak eta lanuzteak iaz, Espainiako Estatuko marka handien lan-hitzarmenari ezetz esateko, baina otsailerako eta uztailerako deituriko lanuzte bana galarazten saiatu ziren Garberako eta Urbilgo Jack&Jones dendetako arduradunak: grebalarien postuak betetzeko, beste behargin batzuk tokialdatu edo haien ordutegiak aldatu zituzten.
