Igandean, Munduko Kopako finala baliatu zuten hainbat sektorek espainolismoari gorazarre egiteko, eta ez hori bakarrik: alfonbra gorri modura erabili zuten zenbait faxistak. Cake Minuesa probokatzaile faxista Bilboraino (Bizkaia) etorri zen, Espainiako Selekzioa "animatzea" aitzakiatzat hartuta (Ertzaintzak eman zion eskolta); eta Revuelta talde faxistak aurrez jakinarazi zuen Donostiaraino (Gipuzkoa) etorriko zirela hainbat kide "selekzio nazionala animatzera": "Inork ez dezala [Espainiaren] kamiseta armairuan gorde".
Berriozarren (Iruñerria, Nafarroa), Núcleo Nacional antolakunde faxistaren kamiseta jantzita joan zen gizon bat taberna batera, finala ikustera. Faxista horren presentziaren berri izatean, irmo erantzun zuten hainbat pertsonak, tabernan bertan bere kontra joz; hainbat hedabideren arabera, zenbait militar ere bazeuden berekin. Erantzun antifaxista hori kriminalizatuz, gertakariak manipulatu dituzte masa-hedabideek, Espainiako Selekzioa animatzen ari zen jendearen aurkako eraso soil bat izan zela salduz.
Alderdi politiko instituzionalek, gainera, diskurtso faltsu hori erosi dute, antifaxisten erantzuna gaitzetsiz. Nafarroako Voxek adierazi du auzitegietara joko duela, eta "Justiziaren aurrera" eramango dituela naziaren kontra jo zuten pertsonak.
Hona hemen erreakzio horietako batzuk:
Vox: "ETArrata nazkagarriak"
PP: "Betiko kale-borroka da"
UPN: "Abertzale erradikalei" aipamena berriz ere
EH Bildu: "Ez litzateke inoiz gertatu behar gure herrian"
PSN: "Tolerantzia eta errespetua"
Geroa Bai: "Errespetuan oinarritutako elkarbizitza"
Berriozarko Gaztetxea: "Erantzun antifaxista kolektiboa"
Berriozarko Txolin Gaztetxeak ohar bat argitaratu du igandean berrian gertatutakoaren harira, eta defendatu du "erantzun antifaxista kolektiboa" izan zela Núcleo Nacionaleko sinbologia "harro" erakusten zuten pertsonen aurka ikusitakoa. "Hedabide burgesak zein sare sozialetako kontu erreakzionarioak istorio manipulatu bat zabaltzen saiatu dira, arrazoirik gabeko eraso bat izan balitz bezala aurkeztuz eta ezkutatuz probokazio faxista neonazi bati emandako erantzuna izan zela". Horiek horrela, Txolin Gaztetxetik ezinbestekotzat jo dute "inolako tolerantziarik ez" izatea "faxismoaren, neonazismoaren eta ideologia baztertzaileen presentziaren aurrean".
