Gazte batek deklaratu behar izan du gaur Donostiako (Gipuzkoa) epaitegian, Palestinako herriarekin elkartasunez iaz izan zen mobilizazio bat dela-eta. Gutxienez 14.000 euroko zigor ekomiko bat jar diezaiokete auzipetuari, Donostiako Gazte Koordinadora Sozialistak aste honetan jakinarazi duenez.

Auzipetutako gazteari babesa emateko, kontzentrazio bat antolatu zuen gaur goizerako GKSk. Epaitegi aurrean elkarretaratu dira, beraz, 11:30ean. Errepresioaren aurka eta eskubide politikoen defentsan bildu dira hainbat lagun.

Iazko azaroaren 3an Donostian izan zen mobilizazio baten harira auzipetu dute gaur deklaratu behar izan duen pertsona. Egun horretan, GKSk deituta, protesta bat izan zen PSOE alderdiaren egoitza aurrean: palestinar herriari elkartasuna adierazi zioten eta Israelgo entitate sionista palestinarren kontra egiten ari den genozidioa salatu zuten.