Beste eraso matxista baten berri eman dute Bilbon (Bizkaia). Izan ere, emakume bati sexu-erasoa egin dio bere bikotekide ohiak, labana batekin mehatxu eginez. Biktimaren etxeko atariko eskaileran ezkutatu zen gizonezkoa, eta emakumea bertara itzuli zenean eraso zion bizkarretik: iletik heldu zion eta, indarrez, pisura sartzera behartu zuen. Han egin zion sexu-erasoa, hainbat lesio eraginez.
Etxebizitzatik ateratzea lortu zuen biktimak, eta laguntza eskatu zuen. Handik gutxira atxilotu zuten erasotzailea, atzo goizean bertan, Bilboko erdigunean. 40 urte ditu.
