Leihoak hautsita eta erabateko desordenarekin esnatu da gaur, asteartea, Donostiako (Gipuzkoa) Intxaurrondo auzoko Letaman gaztetxea. Hau, baina, ez da azkenaldian jasan behar izan duen lehen erasoa izan. Duela hiru hilabete lapurtzera sartu ziren gaztetxera, baita joan den asteazkenean ere. Azaroaren 20an, musika aparatuak eta alkohola eraman zituzten lapurrek.

Gaurko erasoan zer lapurtu duten oraindik ez dakite gaztetxeko kideek, baina eraso jarraituei amaiera eman nahi diete. Erasook sorturiko desordenei eta txikizioari aurre egiteko, auzolanera deitu dute gaurko, baita abenduaren 14erako ere.

Gaztetxeko kideen esanetan, "oso gutxinaka lortzen dituzten" "baliabide kolektiboek", "auzoaren beharrei ekarpena egitea" dute helburu. Hala, baliabide horien aurkako erasoek auzoan "eragin larria" dutela diote. Gainera, azpimarratu dute "eraldaketa sozialaren zailtasun eta oztopoen adibide" direla gaztetxeari egindako erasoak, eta halako praktikak salatzeaz gain, "eguneroko jardunean berretsi" dira.

Erasoak langile kontrol espazioeta

Zenbakaitzak dira langile kontrol espazioetan jasan behar izaten diren askotariko erasoak. Esaterako, iragan udan, Larraungo (Nafarroa) Printzako, Zizur Nagusiko (Nafarroa) Esparru gaztetxeko eta Burlatako Gaztetxeko kideek, espazio horietan egindako erasoak salatu zituzten.