Donostiako Etxebizitza Sindikatu Sozialistak jakinarazi duenez, euren etxea galtzeko arriskuan daude Añorgako bi familia, tartean, 2 eta 13 urteko bi haur. Azpierrentan bizi dira gaur egun, baina iruzur egin die errentatzaileak. Izan ere, legez alokairu-kontratua daukan pertsonak logelak alokatu zizkien bi familiei, baina gero, ez zizkion etxejabeari errentak ordaindu. Hori dela-eta, etxegabetuak izateko arriskuan daude engainatuak izan diren maizterrak. 

"Kontraturik ezak, besteak beste, erabateko babesgabetasun egoeran utzi ditu familiak, lege eta administrazio publikoan eskubiderik gabe. Ez kaltetuak haiek direla azaltzeko eta ezta alternatiba bat eskatzeko ere", salatu dute Etxebizitza Sindikatu Sozialistatik. Desalojoaren aurka erantzuteko, hainbat deialdi egin ditu: uztailaren 2an, auzo-asanblada bat izango da Amassorrainen, 18:30ean; eta desalojoa ezarrita dagoen egunean, uztailaren 3an, etxegabetzeari aurre egingo diote sindikatutik. 09:00etan Añorga hiribideko 8. zenbakira bertaratzera deitu dute.